മികച്ച അഭിനയം കാഴ്ചവെച്ച തഴക്കര രാജം

“നാടകാഭിനയത്തിൻ്റെ കാര്യം ഒരുപാട് പറഞ്ഞു. ഞാൻ ആദ്യം അഭിനയിച്ചു തുടങ്ങിയത് സിനിമയിലാണ്. ഇനി ആദ്യം അഭിനയിച്ച സിനിമയെ കുറിച്ചു കൂടി പറയാം. അച്ഛൻ്റെ മരണശേഷമാണ് ഞാൻ സിനിമാ അഭിനയം തുടങ്ങിയത്. എന്നെ തയ്യൽ പഠിപ്പിക്കുന്ന ആശാനാണ് എന്നെ ഉദയാസ്റ്റുഡിയോയിൽ കൊണ്ടുപോയത്. അലപ്പുഴ ജില്ലയിൽ ഉണ്ടായിരുന്ന ഉദയാസ്റ്റുഡിയോ അന്നാണ് ഞാൻ ആദ്യമായി കാണുന്നത് (ഇപ്പോൾ ആ സ്റ്റുഡിയോ ഇല്ല)അവിടെ കുഞ്ചാക്കോ സാറും പ്രേംനസീർ സാറും ശാരംഗപാണി സാറുമൊക്കെയുണ്ട്. സിനിമയിൽ കണ്ടു പരിചയമുള്ളത്. മറ്റുള്ളവരെ ആരേം അറിയില്ല. എന്നെ സ്റ്റുഡിയോയിൽ കൊണ്ടുപോയ തയ്യൽആശാൻ കഞ്ചാക്കോ സാറിനോട് പറഞ്ഞു ഇവൾ അഭിനയം പഠിക്കാൻ വന്നതാണ്. കുഞ്ചാക്കോ സാർ ശകുന്തളയുടെ ഒരു തോഴിയുടെ വേഷം തന്നെ എന്നെ കെട്ടിച്ചു. ആ തോഴി അങ്ങോട്ടും ഇങ്ങോട്ടും നടക്കുന്ന വേഷമാണ് എനിക്ക് തന്നത്. പ്രേംനസീർ സാറിൻ്റെ കൂടെ നടന്നു വരുന്നതും രാജത്തിനെക്കൊണ്ട് ചെയ്യിച്ചു. അങ്ങോട്ടും ഇങ്ങോട്ടും നടക്കുന്ന വേഷങ്ങളാണ് കൂടുതൽ ചെയ്യിച്ചത്. അത്തരം കൊച്ചു വേഷത്തോടെയാണ് സിനിമാ അഭിനയം തുടങ്ങിയത്. ശകുന്തളയിലെ അഭിനയം കഴിഞ്ഞ് വീട്ടിലേയ്ക്ക് പോയി. അതിനു ശേഷം വന്ന ഓരോ സിനിമയിലേക്കും എന്നെ വിളിച്ച് ഓരോ ചെറിയ വേഷങ്ങൾ കുഞ്ചാക്കോ സാർ തരുമായിരുന്നു. ശകുന്തളയ്ക്കു ശേഷം ലോറനീഎവിടെ എന്ന ചിത്രമായിരുന്നു. ആ ചിത്രത്തിലും ചെറിയ റോൾ എനിക്കു തന്നു. ചിത്രങ്ങൾ ഓരോന്നും അഭിനയിക്കുമ്പോൾ അഭിനയിക്കാനുള്ള എൻ്റെ കഴിവ് കൂടി കൊണ്ടിരുന്നു. പിന്നീട് ഞാൻ നാടകാഭിനയം തുടങ്ങുന്നതുവരെ ഓരോ ചിത്രത്തിലും എന്നെക്കൊണ്ട് അഭിനയിപ്പിക്കുമായിരുന്നു. പഞ്ചവൻകാട്, ജയിൽ, തിലോത്തമ, അനാർക്കലി, ഏഴുരാത്രി, അന്വേഷിച്ചുകണ്ടെത്തിയില്ല തുടങ്ങിയ സിനിമകളിലും ഞാൻ അഭിനയിച്ചു.